1Th 1 | GbrGAW | STEP | Wasika ye gmi n Bulus aba nu, ɓedo n Silwanus yi, n Timatawus yi, kwoi lo ikklisiya aba n Tasaluniki, ofye nfye zhin Shekwoyi; Dada nya, n Dagayi Yesu Kristiyi nyi. Anabarka, n bugbafu yi, ɓa ze efye cauta dnagmayi nɓa kun n Shekwoyi eyi Dada aba n Yesu Kristi eyi Dagayi nyi.

1 Thessalonians 1

1 Wasika ye gmi n Bulus aba nu, ɓedo n Silwanus yi, n Timatawus yi, kwoi lo ikklisiya aba n Tasaluniki, ofye nfye zhin Shekwoyi; Dada nya, n Dagayi Yesu Kristiyi nyi. Anabarka, n bugbafu yi, ɓa ze efye cauta dnagmayi nɓa kun n Shekwoyi eyi Dada aba n Yesu Kristi eyi Dagayi nyi.

2 Yi sa Shekwoyi ami lo cici ntu fye ɓo, yi zhin aduwa ga fye nsayi vinya. 3 Yi ta ze ofye atnu-tnu ye-ye nya amwi, esa n yi daɓo n Shekwoyi Dadayi, ntu fye ɓom, nfye gaiciya ga kalada yi, nfye awyetu yi nfye cei ntu Dagayi Yesu Kristi jezeɓe ɓo nna anyi nyin.

Gaiciya-ga Kpakalayi

4 Yi kpelo ge Shekwoyi la fye kni, eyi azaje ye-yeyi n Shekwoyi ye fye n mwa nyi. 5 Gama esa n yi ɓei ɓe fye n Nabari manayi nyi, kwo to ɓei ze oɓo gbeloyi nu n fye aban, ama fye ɓei kna tnubua n na gmadayi. Enya n yi ɓei gna fye, kwo ɓei ku tnu-tnu yakwo lo nfye mi, ntu ge Zafun Gyi-gyi-yi ɓei ku buzangna ga fye, fya kpe lalei ge ɓeda n yi gna fye nyi kwo zhin gaiciya nu. Fyei kpe lo shi eyi ase-se ɓei ku wu fye nge eyi ɓeda zhin gaiciya nu. 6 Ntu ce nu fye ku ze eyi aviyi n Shekwoyi anya yi, ntu ge fye ɓei la eyi ɓeda gwo n bugba buibuyi n Zafun Gyi-gyi-yi aba, to fyei gye efye anuwan n wahala yi nbugbawun yi n kwo ɓei ɓe fye n ce yin.

7 Ofye nfyehin fye ku ze ɓesisi n a Yesu-viyi aba, nɓa fi n Helleni kni nyi. 8 Nsaiye Dagayi ɓeda nla kun nfye aba, kwoi gnami lo azaje aba vinya, kwoi lo aknido, ntu ge abaho-bahoyi n ya lo ya wo aza ɓai gna yi efye gaiciya ga ɓo. 9 Ntu ge ɓa gnayi shi fye ɓei gwo yi nwu, shi fye ɓei pmi avun wu efye ashan-gba, fya vi Shekwoyi, n nabai nsayi ye Shekwoyi wye-wyeyi da n gaiciya da yi, wo nu gmanyi ɓa ze fye tukwoda. 10 Ɓai da lo ngye shi fye nawyetuyi lo ntu Shekwoyi Nugun jezeɓe n ʼshe, wato Yesu, n Shekwoyi ɓei la wo kala n vingwo nyi, wo nu zhin eyi Gniyi n Shekwoyi minagyi n kwo ɓe lo nyi.